Aur Na Dar-Ba-Dar Phira Aur Na Aazma Mujhe

Anwar Shuoor

aur na dar-ba-dar phira aur na aazma mujhe

bas mire parda-dar bas! ab nahin hausla mujhe

saḳht nazar-fareb hai a.ina-ḳhana-e-jamal

us ki chamak-damak na dekh, dekh bujha bujha mujhe

habs-e-hujum-e-ḳhalq se ghuT ke alag hua to main

qatra ba-sat.h-e-bahar tha chaaT ga.i hava mujhe

sabr karo muhasibo vaqt tumhen bata.ega

dahr ko main ne kya diya dahr se kya mila mujhe

sirf usi ke samne ḳhvar kiya tha aas ne

yaas ne fard fard par aa.ina kar diya mujhe

tere hi misr ka malal tere hi najd ka ḳhayal

shahr-ba-shahr ku-ba-ku gam-ba-gam tha mujhe

kar-gah-e-baqa mujhe zat-o-hayat-o-ka.enat

zat-o-hayat-o-ka.enat da.era-e-fana mujhe

zat-o-hayat-o-ka.enat be-sar-o-pa o be-sabat

be-sar-o-pa o be-sabat shai se umiid kya mujhe

raat lughat-e-umr se main ne chuna tha ek lafz

lafz bahut ajiib tha yaad nahin raha mujhe

tha guzaran guzar gaya vaqt-e-visal aur bas

ḳhaak bhi chhanta phira phir na kabhi mila mujhe

main ne hansi-ḳhushi use jaane diya tha haan magar

ye to muahida na tha muḌ ke na dekhna mujhe

shaam us aadmi ki yaad aa.i jo ek umr ba.ad

janiye kis azaab men kar ga.i mubtala mujhe

main ne use shikast di sina-ba-sina lab-ba-lab

sina-ba-sina lab-ba-lab us ne hara diya mujhe

jo na suna tha dahr se us ki zaban se sun liya

ab mujhe koi kuchh kahe fikr nahin zara mujhe

hain tiri mehrbaniyan bhuli hui kahaniyan

bhuli hui kahaniyan yaad na ab dila mujhe

fan ko samajh liya gaya mahz atiyya-e-falak

sa.i-o-riyaz ka sila ḳhuub diya gaya mujhe

mahram-e-ḳhas dekhna so to nahin gaya ‘shu.ur’

der hui sune hue koi na.i sada mujhe