Sahir Hoshiyarpuri
tere mahal men kaise basar ho is ki to gira.i bahut hai
main ghar ki angna.i men ḳhush huun mere liye angna.i bahut hai
apni apni zaat men gum hain ahl-e-dil bhi ahl-e-nazar bhi
mahfil men dil kyuun kar bahle mahfil men tanha.i bahut hai
gharq-e-dariya hona yaaro ‘ghalib’ ne kyuun chaha aḳhir
aisi marg-e-la-varis men socho to rusva.i bahut hai
dushman se ghabrana abas hai ghair se Darna bhi la-hasil
kul ka ghatak ghar ka bhedi ek vibhishan bhaa.i bahut hai
barson men ik jogi lauTa jangal men phir jot jaga.i
kahne laga ai bhole shankar shahron men mahnga.i bahut hai
apni dharti hi ke dukh-sukh ham in sheron men kahte hain
ham ko himala se kya matlab us ki to uncha.i bahut hai
pursish-e-gham ko ḳhud nahin aa.e un ka magar paigham to aaya
hijr ki rut men jan-e-hazin ko duur ki ye shahna.i bahut hai
dil ki kitaben paḌh nahin sakta lekin chehre paḌh leta huun
Dhalti umr ki dhuup men ‘sahir’ itni bhi bina.i bahut hai
Leave a Reply