niind ke badle tasalli hi sahi aati to hai
dil se baten karte karte raat kaT jaati to hai
kya isi ka naam hai soz-e-mohabbat ham-nashin
ek bijli si miri rag rag men lahrati to hai
is se baḌh kar aur kya tasir gham ki chahiye
dil ki aahon se jigar ki choT chhil jaati to hai
kya yahi hai ai mohabbat hasti-e-dil ka ma.aal
ik lahu ki buund mizhgan par nazar aati to hai
kuchh ba-zahir vasta is se hamen ho ya na ho
dekh kar us ki nigahen ruuh tharrati to hai
soz-e-gham se jab bahut jalta hai dil apna ‘jigar’
ruuh ki manzil men kuchh kuchh raushni aati to hai
Leave a Reply