Sufi Tabassum
jab ashk tiri yaad men ankhon se Dhale hain
taron ke diye surat-e-parvana jale hain
sau baar basa.i hai shab-e-vasl ki jannat
sau baar gham-e-hijr ke sho.alon men jale hain
har aan umangon ke badalte rahe tevar
har aan mohabbat men na.i raah chale hain
mahtab se chehre the sitaron si nigahen
ham log inhi chand sitaron men pale hain
noche hain kabhi ham ne havadis ke gareban
nakami-e-koshish pe kabhi haath male hain
tarik fazaon ke ubharte rahe tufan
phir bhi tiri yadon ke diye ḳhuub jale hain
kya janiye ye rind bure hain ki bhale hain
saaqi ki nigahon ke isharon pe chale hain
mahsus ye hota hai ki duniya ki baharen
us gul-kada-e-naz ke saa.e ke tale hain
yunhi to dil-avez nahin sher-e-‘tabassum’
ye naqsh tire husn ke sanche men Dhale hain
Leave a Reply