Na Daulat Ki Talab Thi Aur Na Daulat Chahiye Hai

Farhat Nadeem Humayun

na daulat ki talab thi aur na daulat chahiye hai

mohabbat chahiye thi bas mohabbat chahiye hai

saha jaata nahin ham se gham-e-hijr-e-musalsal

zara si der ko teri rifaqat chahiye hai

tira didar ho ankhen kisi bhi samt dekhen

so har chehre men ab teri shabahat chahiye hai

kiya hai tu ne jab tark-e-ta.alluq ka irada

hamen bhi faisla karne ki mohlat chahiye hai

ye kyuun kahte ho rah-e-ishq par chalna hai ham ko

kaho ki zindagi se ab faraghat chahiye hai

nahin hoti hai rah-e-ishq men asan manzil

safar men bhi to sadiyon ki masafat chahiye hai

gham-e-janan ke bhi kuchh der to ham naaz uTha len

gham-e-dauran se thoḌe din ki ruḳhsat chahiye hai

har ik apni zarurat ke tahat ham se hai milta

hamen bhi ab koi hasb-e-zarurat chahiye hai

hai jab se mun.akis chehra badalne ka vo manzar

hamari a.ina-ankhon ko hairat chahiye hai

jo niklen alam-e-vahshat se phir kuchh aur sochen

ḳhirad se rabte rakhne ko fursat chahiye hai