Guzar Gai Hai Abhi Saat-e-Guzishta Bhi

guzar gai hai abhi sa.at-e-guzishta bhi

nazar uTha ki guzar jaega ye lamha bhi

bahut qarib se ho kar guzar gai duniya

bahut qarib se dekha hai ye tamasha bhi

guzar rahe hain jo bar-e-nazar uThae hue

ye log mahv-e-tamasha bhi hain tamasha bhi

vo din bhi the ki tiri ḳhvab-gin nigahon se

pukarti thi mujhe zindagi bhi duniya bhi

jo be-sabati-e-alam pe bahs thi sar-e-bazm

main chup raha ki mujhe yaad tha vo chehra bhi

kabhi to chand bhi utrega dil ke angan men

kabhi to mauj men aaega ye kinara bhi

nikal dil se gae mausamon ki yaad ‘ajmal’

tiri talash men imroz bhi hai farda bhi

Leave a Comment