Lala-Ru Tum Ghair Ke Pale paDe

lāla-rū tum ġhair ke paale paḌe

dekhne ke haiñ hameñ laale paḌe

jab nazar surme ke dumbāle paḌe

dil ke pīchhe tiir aur bhāle paḌe

is baras furqat meñ tere ashk ke

chashm se bahte haiñ parnāle paḌe

ham havā-e-vasl meñ yaañ tak phire

jo havas ke paañv meñ chhāle paḌe

aariz us ke par nahīñ zulf-e-siyāh

ganj par sote haiñ do kaale paḌe

aah aur naale ke girdā-gird dil

phirte haiñ rātoñ ko rakhvāle paḌe

kyā nazākat hai ki bosa lete hī

hoñT par us gul ke tab ḳhāle paḌe

āñkheñ us ḳhūñ-ḳhār se phir jā laḌīñ

zaḳhm-e-dil ke haiñ abhī aale paḌe

ishq ke hāthoñ se juuñ farhād-o-qais

kyā kahīñ kis kis ke ghar ghāle paḌe

āshiq us kī mast āñkhoñ ke mudām

phirte haiñ behosh matvāle paḌe

shaiḳh tum filhāl dar-bazm-e-sama.a

bad-usūlī se ho be-tāle paḌe

apne ghar meñ shaiḳh añdherī raat meñ

haath jo aave use jā le paḌe

khole ye shīshoñ ke muñh saaqī ne aaj

bazm meñ tirte haiñ kyā pyāle paḌe

uḌte phirte haiñ zamīñ par shakl-e-abr

parcha parcha ruuī ke gaale paḌe

dar par us gul ke ‘muhib’ tum se hazār

phirte haiñ dil bechne vaale paḌe

Leave a Comment