Jamal Owaisi
patthar se mukalima hai jaari
donon hi taraf hai hoshiyari
vahshat se main bhagta raha huun
phir mujh pe junun hua hai taari
darvesh ko rakh ke ḳhak-e-pa men
karta hai zamana shahryari
patthar se mujhe na choT pahunchi
ik gul ne diya hai zaḳhm kaari
shahri vatan-e-aziz ka huun
lekin hai shi.ar ashk-bari
maz.hab hai mira tariq-e-hindi
derina buton se apni yaari
paaya hai farogh-e-secularism
talvar hui hai ab do dhari
guzre hue din ka isti.ara
ye maulvi aur ye bhikari
Leave a Reply