husn-e-hijab-ashna janib-e-bam aa gaya
bada-e-tah-nashin-e-jam ta lab-e-jam aa gaya
aap ne phenk di naqab garmi-e-ishq dekh kar
hashr-navaz husn aaj hashr ke kaam aa gaya
millat-e-kufr-o-din ki bahas garm thi ḳhanqah men
itne men koi mai piye dast-ba-jam aa gaya
shauq ka e’tibar kya yaas ye iḳhtiyar kya
rah-e-ummid-o-bim men dil ka maqam aa gaya
dil mira dekhta raha aur meri zaban par
lazzat-e-jan-e-arzu aap ka naam aa gaya
dahr javan ho gaya khul gaya mai-kade ka dar
saqi-e-mast mast-e-naz mast-e-ḳhiram aa gaya
jalva-e-be-hijab ko ḳhuub samajh raha huun main
mahshar-e-did muntazir manzar-e-am aa gaya
‘kaifi’-e-be-qarar sun ye rag-e-jan ke saaz se
hai miri iltija qubul dil ka payam aa gaya
Leave a Reply