ye ji men hai ki mohabbat ka baab likhkungi
janab-e-man ko main ali-janab likkhungi
kabhi jo bhule se paḌh le vo jaan hi lega
main raz-e-ishq ko yuun be-hisab likkhungi
jo hausla hai to munh pher kar guzar jaa.e
main us ki chashm-e-karam ko itaab likkhungi
mire nasib ka dar-o-madar hai us par
dil-e-ḳharab ko ḳhana-ḳharab likkhungi
hisab lungi tiri kaj-ada.i ka aksar
kabhi vafa ko tiri be-hisab likkhungi
buland parcham-e-insaniyat rahe jis men
main daur-e-nau ka vo a.ala nisab likkhungi
hazar mujh ko malamat ka samna ho magar
azab-e-zist ko kar-e-savab likkhungi
jo mere baad paḌhi jaa.e ek muddat tak
main husn-o-ishq ki aisi kitab likhungi
Leave a Reply