Ye Ji Mein Hai Ki Mohabbat Ka Bab Likhkungi

ye jī meñ hai ki mohabbat kā baab likhkūñgī

janāb-e-man ko maiñ ālī-janāb likkhūñgī

kabhī jo bhūle se paḌh le vo jaan hī legā

maiñ rāz-e-ishq ko yuuñ be-hisāb likkhūñgī

jo hausla hai to muñh pher kar guzar jaa.e

maiñ us kī chashm-e-karam ko itaab likkhūñgī

mire nasīb kā dār-o-madār hai us par

dil-e-ḳharāb ko ḳhāna-ḳharāb likkhūñgī

hisāb lūñgī tirī kaj-adā.ī kā aksar

kabhī vafā ko tirī be-hisāb likkhūñgī

buland parcham-e-insāniyat rahe jis meñ

maiñ daur-e-nau kā vo a.alā nisāb likkhūñgī

hazār mujh ko malāmat kā sāmnā ho magar

azāb-e-zīst ko kār-e-savāb likkhūñgī

jo mere baad paḌhī jaa.e ek muddat tak

maiñ husn-o-ishq kī aisī kitāb likhūñgī

Leave a Comment