Poet
mira payam hai arbab-e-fikr-o-fan ke liye
ki man ka ḳhuun na karen irtaqa-e-tan ke liye
jahan-e-fikr men tasbih bhi hai tegh bhi hai
vo ḳhud-shikan ke liye hai ye saf-shikan ke liye
miri samajh men na yazdaniyon ki baat aa.i
ik ahraman se laḌa.i ik ahraman ke liye
tira ye falsafa-e-ham-vajudiyat ai dost
na shaiḳh ke liye mauzun na barhaman ke liye
badal ga.i hai kuchh is tarah baghban ki nazar
ki jaise meri zarurat nahin chaman ke liye
kaho haram ke javanon se arziyan bhejen
ki ḳhadimon ki zarurat hai barhaman ke liye
mili hai mujh ko andheron se raushni ‘faruq’
charagh huun main zamane ki anjuman ke liye
Leave a Reply