Mehdi Baqar Khan Meraj
maut ko nazar tu sanson ke nivale kar de
azm ko tegh iradon ko tu bhale kar de
ḳhema-e-dil men andheron ke siva kuchh bhi nahin
tu agar chahe to pal bhar men ujale kar de
taaki sunsan shabistan ko varis mil jaa.e
ik diya koi haveli ke havale kar de
phuuT ke rona hai tujh ko to sar-e-rah na ro
itna ehsan mire paanv ke chhale kar de
is liye rakhta huun main ashkon ka pahra har dam
vaqt phir se na kahin aankh men jaale kar de
be-gunahi mujhe azad kara hi legi
laakh mazbut tu zindan ke taale kar de
Leave a Reply