shad-azimabadi

Kaba Bhi Hai Tuta Hua But-Khana Hamara

kaaba bhi hai tuuta hua but-khana hamara

yarab rahe abad ye virana hamara

batin ki tarah paak hai khum-khana hamara

kyuun kar na achhuta rahe paimana hamara

jo shama hua karti hai raushan sar-e-bazar

us shama pe girta nahin parvana hamara

saaqi tira mai-khana rahe hashr tak abad

bhar jaata hai kashkol-e-gadayana hamara

bah jaega is bazm men ik faiz ka dariya

aata hai chhalakta hua paimana hamara

chal su-e-adam chal hamen kya uzr hai ai maut

tayyar hai saman-e-gharibana hamara

ban jaata hai phir shaikh ka bhi murshid-e-kamil

Dagta nahin piita hai jo paimana hamara

kis zulf ko suljhaen raqiban-e-siyah-kar

chhuta nahin is zulf ko phir shana hamara

fariyad-kunan hain kisi pazeb ke daane

tode kahin zanjir na divana hamara

kharon se ye kah do ki gul-e-tar se na uljhen

sikhe koi andaz-e-sharifana hamara

tasir na ho ‘shad’ to dena hamen ilzam

kuchh der to sun vaaiz hakimana hamara

More Poems

Leave a Comment