Ye Dhoka Ho Na Ho Ummid Hi Malum Hoti Hai

Poet

ye dhoka ho na ho ummid hi malum hoti hai

ki mujh ko duur se kuchh raushni malum hoti hai

ḳhuda jaane kis andaz-e-nazar se tum ne dekha hai

ki mujh ko zindagi ab zindagi malum hoti hai

isi ka naam shayad zindagi ne yaas rakha hai

nafas ki jo khaTak hai aḳhiri malum hoti

hua hai husn se kuchh aur aks-e-husn-e-ḳhuddari

ḳhamoshi un ke honTon par hansi malum hoti hai

na aaya haath mere baḌh ke jo daman inayat ka

ye mahrumi talab ki kuchh kami malum hoti hai

jhukaya aaj dar par ai zahe baḳht-e-sar-afrazi

tiri rahmat qubul-e-bandagi malum hoti hai

tujhe apne liye dast-e-karam ye janta huun main

ki tu hai jis qadar duniya vahi malum hoti hai

kahan huun kis taraf huun main ḳhabar is ki nahin mujh ko

yahi gum-gashtagi kuchh agahi malum hoti hai

sar-e-mauj-e-nafas kashti-e-dil ko kya kahun ‘kaifi’

ubharti hai jahan tak Dubti ma.alum hoti hai