Chaman Wahi Hai Ghataen Wahi Bahaar Wahi

chaman vahi hai ghataen vahi bahar vahi

magar gulon men vo ab rang-o-bu nahin baaqi

hai dil-kashi men vahi ab bhi mausamon ki bahar

nazar men kaifiyat-e-rang-o-bu nahin baaqi

shabab-e-dahr ki ab bhi hai vo faravani

magar khayal men josh-e-numu nahin baaqi

hai dil men dard bhi pahlu men dil bhi hai lekin

kisi ke dard pe rone ki khu nahin baaqi

haram ki sham-e-farozan hai aaj bhi lekin

tajassus-e-nazar-e-shola-ju nahin baaqi

gale to milte hain ahbab ai ‘haya’ ab bhi

magar dilon men sadaqat ki bu nahin baaqi

Leave a Comment