Iftikhar Arif
ham ahl-e-jabr ke nam-o-nasab se vaqif hain
saron ki fasl jab utri thi tab se vaqif hain
kabhi chhupe hue ḳhanjar kabhi khinchi hui tegh
sipah-e-zulm ke ek ek Dhab se vaqif hain
vo jin ki dast-ḳhaten mahzar-e-sitam pe hain sabt
har us adiib har us be-adab se vaqif hain
ye raat yuun hi to dushman nahin hamari ki ham
darazi-e-shab-e-gham ke sabab se vaqif hain
nazar men rakhte hain asr-e-buland-e-bami-e-mehr
furat-e-jabr ke har tishna-lab se vaqif hain
koi na.i to nahin harf-e-haq ki tanha.i
jo jante hain vo is amr-e-rab se vaqif hain
Leave a Reply