Qamar Jameel
kis safar men hain ki ab tak raste nadida hain
asman pe sham.en raushan hain magar ḳhvabida hain
kitni nam hai ansuon se ye sanam-ḳhane ki ḳhaak
ye tavaf-e-gul ke lamhe kitne atish-dida hain
ye gulistan hai ki chalte hain tamannaon ke ḳhvab
ye hava hai ya bayaban ke qadam larzida hain
ek basti ishq ki abad hai dil ke qarib
lekin is basti ke raste kis qadar pechida hain
aaj bhi har phuul men bu-e-vafa avara hai
aaj bhi har zaḳhm men tere karam poshida hain
aaj ghar ke a.ine men sub.h se ik shaḳhs hai
aur khiḌki men sitare shaam se pechida hain
rahguzar kahti hai jaag ai mahtab-e-sham-e-yar
ham sar-e-bazar chalte hain magar ḳhvabida hain
aa.ine men kis ki ankhen dekhta huun main ‘jamil’
do kanval hain beach paani men magar nam-dida hain
Leave a Reply