raat ke akhiri hisse ki siyahi gahri
haath ko haath sujhai nahin deta phir bhi
khvab men lipte hue andeshe
niind ke ghaar men jaagi ankhen
gahri gahrai men dhire se utarta paani
sahma sahma hua darta paani
paani yakh-basta vazu ka paani
aur khushbu ke musalle pe koi sar-ba-sujud
khud-kalami ki ghadi
kapkapate hue honton pe thirakta hua naam
ek ik lamhe ki ankhon men nami
haath uthte hain khalaon men dua daman-gir
arsh ke niche se chalte hain hava ke jhonke
asmanon men ayaan haibat-e-subh-e-kazib
nuur ki pahli kiran phute ufuq se -amin
Leave a Reply