Zuhoor Ul Islam Javed
farzana huun aur nabz-shanas-e-do-jahan huun
divana huun aur be-ḳhabar-e-sud-o-ziyan huun
halanki main har vaqt vahin huun vo jahan hain
vo sochte rahte hain main kya jaane kahan huun
meri hi taraf hai nigaran vaqt ki devi
har ahd men har daur men taqdir-e-jahan huun
muhtaj-e-tavajjoh miri har nargis-e-maḳhmur
ai dost javan huun main javan huun main javan huun
mujh hi se ibarat hai ye tanzim-e-gulistan
main ḳhanda-e-gul hi nahin kanTon ki zaban huun
qaa.em hai mujhi se mire aslaf ki azmat
main apne buzurgon ki sadaqat ka nishan huun
naghmon ne mire dhuum macha di hai chaman men
‘javed’ main ik tanz pai-e-nauha-giran huun
Leave a Reply