pal rahe hain kitne andeshe dilon ke darmiyan
raat ki parchha.iyan jaise diyon ke darmiyan
phir kisi ne ek ḳhun-alud ḳhanjar rakh diya
ḳhauf ke zulmat-kade men doston ke darmiyan
kya sunahri daur tha ham zard patton ki tarah
dar-ba-dar phirte rahe piili ruton ke darmiyan
ai ḳhuda insan ki taqsim-dar-taqsim dekh
parsaon devtaon qatilon ke darmiyan
ashti ke naam par itni saf-ara.i hui
aa ga.i barud ki ḳhush-bu gulon ke darmiyan
mera chehra ḳhud bhi ashob-e-safar men kho gaya
main ye kis ko DhunDta huun manzilon ke darmiyan
Leave a Reply