jhuuT sach aap to ilzam diye jaate hain
baat sunte nahin dushnam diye jaate hain
tirchhi nazron se kiye us ne bahut dil zaḳhmi
tiir TeḌhe magar kaam diye jaate hain
kah gaya ye bhi koi ruuTh ke jaane vaala
ham tujhe maut ka paigham diye jaate hain
pasban jaag uThen vo to unhen de dena
likh ke kaghaz pe ye ik naam diye jaate hain
aap ke lutf-o-inayat ka yahi hai badla
gham liye jaate hain aram diye jaate hain
dil hua jaan hui un ki bhala kya qimat
aisi chizon ke kahin daam diye jaate hain
tir-e-qatil ko kaleje se laga rakkha hai
ham to dushman ko bhi aram diye jaate hain
kaam aa ja.ega dushman ki mohabbat men kabhi
ehtiyatan dil-e-nakam diye jaate hain
ab to khul khele vo ‘beḳhud’ se ḳhuda ḳhair kare
ab to ḳhud bhar ke use jaam diye jaate hain
Leave a Reply