daagh jalta hai mire siine men
dil pighalta hai mire siine men
shisha-o-sang muqabil aa.e
kuchh chaTaḳhta hai mire siine men
raat bhar raz-e-ḳhirad sirrr-e-junun
dil ugalta hai mire siine men
tera ḳhat hai ki qalam hai mera
kuchh to jalta hai mire siine men
is liye dasht se manus huun main
shahr basta hai mire siine men
banTte rahte hain vo la.al-o-gohar
ghan barasta hai mire siine men
chuḌiyan khanki hain phir raat ga.e
husn sajta hai mire siine men
phir ḳhizan men khila baghi ghuncha
dil larazta hai mire siine men
ism-e-saqi vahi ism-e-azam
kaun japta hai mire siine men
dil mira qurrat-o-mansur ka naam
le ke chalta hai mire siine men
be-ḳhudi aur ḳhudi ka taaga
ja ulajhta hai mire siine men
baada ‘suqrat’ vahan piita hai
dam nikalta hai mire siine men
baada ‘suqrat’ se ‘tal.at’ ko mila
sach panapta hai mire siine men
Leave a Reply