Hasrat Mohani
khu samajh men nahin aati tire divanon ki
damanon ki na khabar hai na girebanon ki
jalva-e-saghar-o-mina hai jo ham-rang-e-bahar
raunaqen turfa taraqqi pe hain mai-khanon ki
har taraf be-khudi o be-khabari ki hai numud
qabil-e-did hai duniya tire hairanon ki
sahl is se to yahi hai ki sambhalen dil ko
minnaten kaun kare aap ke darbanon ki
aankh vaale tiri surat pe mite jaate hain
sham-e-mahfil ki taraf bhiid hai parvanon ki
ai jafakar tire ahd se pahle to na thi
kasrat is darja mohabbat ke pashimanon ki
raz-e-gham se hamen agah kiya khuub kiya
kuchh nihayat hi nahin aap ke ehsanon ki
dushman-e-ahl-e-muravvat hai vo begana-e-uns
shakl pariyon ki hai khu bhi nahin insanon ki
hamrah-e-ghair mubarak unhen gul-gasht-e-chaman
sair ham ko bhi mayassar hai bayabanon ki
ik bakheda hai nazar men sar-o-saman-e-vajud
ab ye halat hai tire sokhta-samanon ki
faiz-e-saqi ki ajab dhuum hai mai-khanon men
har taraf mai ki talab maang hai paimanon ki
ashiqon hi ka jigar hai ki hain khursand-e-jafa
kafiron ki hai ye himmat na musalmanon ki
yaad phir taaza hui haal se tere ‘hasrat’
qais o farhad ke guzre hue afsanon ki
Leave a Reply