Shaz Tamkanat
mira zamir bahut hai mujhe saza ke liye
tu dost hai to nasihat na kar ḳhuda ke liye
vo kashtiyan miri patvar jin ke TuuT ga.e
vo badban jo taraste rahe hava ke liye
bas ek huuk si dil se uThe ghaTa ki tarah
ki harf o saut zaruri nahin dua ke liye
jahan men rah ke jahan se barabari ki ye choT
ik imtihan-e-musalsal miri ana ke liye
namida-ḳhu hai ye miTTi har ek mausam men
zamin-e-dil hai tarasti nahin ghaTa ke liye
main tera dost huun tu mujh se is tarah to na mil
barat ye rasm kisi surat-ashna ke liye
milunga ḳhaak men ik roz biij ke manind
fana pukar rahi hai mujhe baqa ke liye
mah o sitara o ḳhurshid o charḳh haf-iqlim
ye ehtimam mire dast-e-na-rasa ke liye
jafa jafa hi agar hai to ranj kya ho ‘shaz’
vafa ki pusht-panahi bhi ho jafa ke liye
Leave a Reply