husn jab maqtal ki janib tegh-e-burran le chala
ishq apne mujrmon ko pa-ba-jaulan le chala
ḳhun-e-nahaq ki haya boli zara munh Dhank lo
naaz jab un ko sar-e-ḳhak-e-shahidan le chala
ḳhak-e-ashiq rokne ko duur tak lipTi ga.i
jab samand-e-naz ko vo garm-jaulan le chala
jab chali maqtal se qatil ki savari raat ko
aage aage mish.alen ḳhun-e-shahidan le chala
arzu-e-did-e-janan bazm men laa.i mujhe
bazm se main arzu-e-did-e-janan le chala
DhunDti thi har taraf kis ko nigah-e-vapsin
aas kis ke diid ki bimar-e-hijran le chala
naz-e-azadi ‘hasan’ vaj.h-e-asiri ho gaya
mu-kashan dil ko ḳhayal-e-zulf-e-paiman le chala
Leave a Reply