Baghaur Dekh Raha Hai Ada-Shanas Mujhe

Arzoo Lakhnavi

baghaur dekh raha hai ada-shanas mujhe

bas ab zalil na kar ai nigah-e-yas mujhe

ye dil hai shauq men be-ḳhud vo aankh nashshe men chuur

jhuka na de su-e-saghar bhaḌakti pyaas mujhe

udhar malamat-e-duniya idhar malamat-e-nafs

baḌa azaab hai aa.e hue havas mujhe

palaT do baat na lo munh se naam ruḳhsat ka

abhi se ghar nazar aane laga udaas mujhe

jo multafit hain ye nazren badal bhi sakti hain

bana chuka hai zamana ada-shanas mujhe