abdul-majeed-salik

Mere Dil Mein Hai Ki Puchhun Kabhi Murshid-e-Mughan Se

mire dil men hai ki puchhun kabhi murshid-e-mughan se

ki mila jamal-e-saqi ko ye tantana kahan se

vo ye kah rahe hain ham ko tire haal ki khabar kya

tu utha saka nigahen na bata saka zaban se

jo unhen vafa ki sujhi to na ziist ne vafa ki

abhi aa ke vo na baithe ki ham uth gae jahan se

main adam ke lala-zaron men nava-gar-e-azal tha

mujhe khinch laai zalim tiri aarzu kahan se

miri sarnavisht men tha vahi dagh-e-na-muradi

jo mila miri jabin ko tire sang-e-astan se

bache bijliyon ki zad se vahi taeran-e-dana

jo kadak chamak se pahle nikal aae ashiyan se

ye hai majra-e-vahshat ki mila suragh-e-mahmil

na ghubar-e-karvan se na dara-e-karvan se

nahin kuchh samajh men aata ye ajiib majra hai

ki zamin ke rahne valon ko hidayat asman se

shab-e-gham jo aai ‘salik’ mite batni andhere

mira dil hua munavvar tab-o-tab-e-javedan se

More Poems

Leave a Comment