kisu ko mujh se ne mujh ko kisu se kaam rahta hai
mire dil men siva tere ḳhuda ka naam rahta hai
kuchh in rozon dil apna saḳht be-aram rahta hai
isi halat men le kar sub.h se ta-sham rahta hai
kaleja pak gaya hai kya kahun is dil ke hathon se
hamesha kuchh na kuchh is men ḳhayal-e-ḳham rahta hai
bayan main kya karun us se ab aage apni nakami
tire ye taur aur mujh ko tujhi se kaam rahta hai
bala jaane ‘asar’ dauran ye kidhar charḳh maare hai
hamari bazm men din raat daur-e-jam rahta hai
Leave a Reply