ye kitabon ki saf-ba-saf jilden
kaghazon ka fuzul istimaal
raushnai ka shandar israf
sidhe sidhe se kuchh siyah dhabbe
jin ki taujih aaj tak na hui
chand khush-zauq kam-nasibon ne
basar auqat ke liye shayad
ye lakiren bikher daali hain
kitni hi be-qusur naslon ne
in ko padhne ke jurm men ta-umr
le ke kashkul-e-ilm-o-hikmat-o-fan
ku-ba-ku jaan ki bhiik mangi hai
aah ye vaqt ka azab-e-alim
vaqt khallaq be-shuur qadim
saari tarifen un andheron ki
jin men partav na koi parchhain
aah ye zindagi ki tanhai
sochna aur sochte rahna
chand maasum pagalon ki saza
aaj main ne bhi soch rakkha hai
vaqt se intiqam lene ko
yunhi ta-sham saade kaghaz par
tedhe tedhe khutut khinche jaaen
Leave a Reply