Aslam Ansari
kuchh to gham-ḳhana-e-hasti men ujala hota
chand chamka hai to ehsas bhi chamka hota
a.ina-ḳhana-e-alam men khaḌa sochta huun
main na hota to yahan kaun sa chehra hota
ḳhud bhi gum ho ga.e ham apni sadaon ki tarah
dasht-e-furqat men tujhe yuun na pukara hota
husn-e-iz.har ne ra.ana.i ata ki gham ko
gul agar rang na hota to sharara hota
ham bhi ehsas ki tasvir bana sakte the
kaash ham pe kabhi iz.har ka dar va hota
fursat-e-shauq na di karb-e-vafa ne rona
koi e.ajaz to ham ne bhi dikhaya hota
ham ko pahchan ki ai bazm-e-chaman-zar-e-vajud
ham na hote to tujhe kis ne sanvara hota
ek surat se hua naqsh-e-do-alam ko farogh
a.ina TuuT na jaata to tamasha hota
ham ne har ḳhvab ko ta.abir ata ki ‘aslam’
varna mumkin tha ki har naqsh adhura hota
Leave a Reply