ai dil aata hai chaman men vo sharabi tu pahunch
le ke piyala gul ka ghuncha ki gulabi tu pahunch
bhar ke saghar kijiye ḳhali gham-e-dauran se dil
ab na kar taḳhir ai saaqi shitabi tu pahunch
pahne qasid jab talak yak-bar sharh-e-ishtiyaq
le kar ai betab dil ki iztirabi tu pahunch
ḳhvahish-e-dil hai ki kiije sair-e-aqlim-e-junun
Tuk madad ko us ki ai ḳhana-ḳharabi tu pahunch
jaa.e hai tanha shab-e-tarik men vo mehr-vash
ah-e-atish-bar le kar mahtabi tu pahunch
ta na phir sha.ir likhen tausif-e-bala-e-butan
misra.a-e-mauzun-o-sher-e-intiḳhabi tu pahunch
jalva-farma aaj hai taḳht-e-chaman par shah-e-gul
le kar ai paik-e-saba chatr-sahabi tu pahunch
musht-e-ḳhak apni ko aalam men na zaa.e.a kar aziiz
hind se le ta-najaf ai bu-turabi tu pahunch
ai ‘muhib’ ḳhvahish gazak ki ho jo is mai-ḳhvar ko
hai tira siina to dukan-e-kababi to pahunch
Leave a Reply