Haidar Ali Aatish
mohabbat ka tiri banda har ik ko ai sanam paaya
barabar gardan-e-shah-o-gada donon ko ḳham paaya
ba-rang-e-sham.a jis nai dil jalaya teri duuri main
to us nai manzil-e-maqsud ko zer-e-qadam paaya
baja karte hain ashiq taq-e-abru ki parastari
yahi mehrab-e-dair-o-ka.aba men bhi ham ne ḳham paaya
nishana tir-e-tohmat ka hai mera aḳhtar-e-tale
uTha.un daagh main to asman samjhe diram paaya
hazaron hasraten javengi mere saath duniya se
sharar-o-barq se bhi arsa-e-hasti ko kam paaya
siva.e ranj kuchh hasil nahin hai is ḳharabe main
ghanimat jaan jo aram tu ne koi dam paaya
nazar aaya tamasha-e-jahan jab band kiin ankhen
safa-e-qalb se pahlu men ham ne jam-e-jam paaya
jalaya aur maara husn ki nairang-sazi ne
kabhi barq-e-ghazab us ko kabhi abr-e-karam paaya
firaq-anjam kaam aghaz-e-vaslat ka bila shak hai
bahut roya main ruh-o-tan ko jab mushtaq ham paaya
har ik jauhar men us ka naqsh-e-pa-e-raftagan samjha
dam-e-shamshir-e-qatil jada-e-rah-e-adam paaya
hamara kaba-e-maqsud tera taq-e-abru hai
tiri chashm-e-siyah ko ham ne ahu-e-haram paaya
hua hargiz na ḳhatt-e-shauq ka saman durust ‘atish’
siyahi ho ga.i nayab agar ham ne qalam paaya
Leave a Reply