mohabbat ka shikasta-pan nazar kya aa.e bahar se
ye dimak to badan ko chaTti rahti hai andar se
tumhare hijr ka ye dard-e-sar to mustaqil Thahra
mujhe lagta hai jaan le ke ye utrega mere sar se
miri tartib men sahra-mizaji kar-farma hai
bujhegi pyaas kya meri bhala ashkon ke sagar se
teri dahliz pe main muntazir apni na rah ja.un
yahi sab sochti huun lauT aati huun tire dar se
miri ḳhamoshiyon ko chiḳh banne ka bahut Dar hai
koi avaz uThne lag paḌi hai mere andar se
‘samina’ mas.ala ye hai miri qamat se kamtar hai
hamesha pyaas pi kar lauT aati huun samundar se
Leave a Reply