Bedam Shah Warsi

Apne Didar Ki Hasrat Mein Tu Mujhko Sarapa Dil Kar De

apne didar ki hasrat men tu mujh ko sarapa dil kar de

har qatra-e-dil ko qais bana har zarre ko mahmil kar de

duniya-e-husn-o-ishq miri karna hai to yuun kamil kar de

apne jalve meri hairat nazare men shamil kar de

yaan tur-o-kalim nahin na sahi main hazir huun le phunk mujhe

parde ko utha de mukhde se barbad sukun-e-dil kar de

gar qulzum-e-ishq hai be-sahil ai khizr to be-sahil hi sahi

jis mauj men Duube kashti-e-dil us mauj ko tu sahil kar de

ai dard ata karne vaale tu dard mujhe itna de de

jo donon jahan ki vusat ko ik gosha-e-daman-e-dil kar de

har su se ghamon ne ghera hai ab hai to sahara tera hai

mushkil asan karne vaale asan miri mushkil kar de

‘bedam’ us yaad ke main sadqe us dard-e-mohabbat ke qurban

jo jiina bhi dushvar kare aur marna bhi mushkil kar de

More Poems

Leave a Comment