badli hui hai charkh ki raftar aj-kal
ho band rast-goi ka bazar aj-kal
ilm-o-hunar hai mulk ko darkar aj-kal
ham khud bhale-bure ke hain mukhtar aj-kal
hai aur hi tariqa-e-bazar aj-kal
jins-e-nafis ke hain kharidar aj-kal
ghaflat ka daur mulk se shayad guzar gaya
makhluq hoti jaati hai bedar aj-kal
gul-guna-e-taraqqi-e-tahzib-o-alam se
shukr-e-khuda ki surkh hain rukhsar aj-kal
kyuun jante hain sanat-o-hirfat ko bagh-e-khuld
ghairon ki ham nigah men hain khaar aj-kal
raushan hai apni be-hunari aftab se
hai subh ke qarib shab-e-tar aj-kal
bigdi hui hai mai-kada-e-dahr ki hava
ho jaaen shaikh-ji bhi na mai-khvar aj-kal
kya kaam in safed chudailon ka hind men
kyuun aisi shadiyon ki hai bhar-mar aj-kal
har chiiz ki girani ne viran kar diya
sarf-e-khizan hai hind ka gulzar aj-kal
is baagh men hai bad-e-khizan o bad-e-qaht
har gul ke dil men hai khalish-e-khar aj-kal
bhule hain apne farz ko ye khvajgan-e-hind
haq dene men bhi karte hain inkar aj-kal
shukr-e-khuda ki zulm se maazur hai falak
bartaniya hai khalq ki gham-khvar aj-kal
yarab hamare dil ko tu apni panah de
dildar ho gae hain dil-azar aj-kal
makhsus ho chuki hain iradi ghulamiyan
hai ik anaar saikdon bimar aj-kal
ek ek kar ke jitne hunar the vo chhin gae
ham zindagi se kyuun na hon bezar aj-kal
ik jurm aur fard-e-jaraem men badh gaya
yaani na dard-e-dil ka ho izhar aj-kal
jiine ki fikr kijiye aur pet ka khayal
mauquf kiije ishq ka azar aj-kal
pabandiyan bhi chahiyen insan ko zarur
azadiyon ki kyuun hai ye bhar-mar aj-kal
milta nahin kahin dahan-e-yar hai anaaj
faqon se jism hai kamar-e-yar aj-kal
hai tang-dastiyon ke sabab zoaf is qadar
sab ki hain ankhen nargis-e-bimar aj-kal
lakhon muhal aqli o aadi sahi magar
kasb-e-maash sab se hai dushvar aj-kal
kya kiije tar nivalon ka mausam nahin raha
chipke hue hain yaar ke rukhsar aj-kal
faqon se hai ye haal agar tol kar bithaen
aadhe ticket men jaae tan-e-zar aj-kal
gul kar diya charagh-e-maishat tu ai hava
meada ke bhi na ghis gae kyuun khaar aj-kal
charon taraf buland hai fariyad haae haae
matam-kada hai qahqah-e-divar aj-kal
daulat jab aaegi ki vahi chiiz ham banaen
jo chiiz chahte hon kharidar aj-kal
behtar hai kar-khanon se ho mulk ka bhala
ugalen gade khazanon ko zardar aj-kal
sanat ka naam ganj hai hirfat ka naam zar
ilm-e-shikam hai mulk ko darkar aj-kal
‘parvin’ ki ye dua hai rahe amn mulk men
rabb-e-ghafur tu hi hai gham-khvar aj-kal
Leave a Reply