sab barishen ho ke tham chuki thiin
ruhon men dhanak utar rahi thi
main khvab men baat kar raha tha
vo niind men pyaar kar rahi thi
ahval hi aur ho rahe the
lazzat men visal ro rahe the
boson men dhule-dhulae donon
nashshe men lipat ke so rahe the
chhota sa hasin sa vo kamra
ik alam-e-khvab ho raha tha
khushbu se gulab ho raha tha
masti se sharab ho raha tha
vo chhanv sa chandni sa bistar
ham rang naha rahe the jis par
yuun tha ki ham apni zaat ke andar
the apna hi ek aur manzar
sairab mohabbaton ke dhare
baham the vajud ke kinare
mauzu-e-sukhan, sukhan the saare
aalam hi ajiib the hamare
jaage vo lahu men silsile phir
tan man ke vahi the zaiqe phir
tham tham ke baras baras gae phir
patal tak ho gae hare phir
jaari tha vo raqs-e-ham-kinari
nikli nai subh ki savari
aisa laga kaenat saari
is aan to hai faqat hamari
jab chand mira naha ke nikla
main dil ko diya bana ke nikla
kashkol-e-dua utha ke nikla
shaer tha sada laga ke nikla
dariya vo samundaron se gahre
vo khvab gulab aise chehre
sab zaviyon ho gae sunahre
ainon men jab vo aa ke thahre