aine ke aks se gul sa badan maila hua
sub.h ke partav se rang-e-yasman maila hua
saaf ai uryani-e-vahshat kahe deta huun main
post khinchunga agar mera badan maila hua
baad murdan bhi takalluf se kudurat dil men hai
sohbat-e-kafur se apna badan maila hua
kya tiri talvar bhi mujh se ghubar-alud thi
ḳhun-e-dil ka rang kyuun ai tegh-zan maila hua
shaeron men guftugu aai kudurat ki baham
saaf kahta huun ki ab rang-e-suḳhan maila hua
vasl ki shab baton baton men mukaddar ho gai
guftugu-e-bosa se rang-e-dahan maila hua
saf-goi se ghubar aine men aaya ‘munir’
meri baton se dil-e-ahl-e-suḳhan maila hua