Chandrabhan Khayal
justuju ke paanv ab aram sa paane lage
ab hamare paas bhi kuchh raste aane lage
vaqt aur halat par kya tabsira kiije ki jab
ek uljhan dusri uljhan ko suljhane lage
shahr men jurm-o-havadis is qadar hain aj-kal
ab to ghar men baiTh kar bhi log ghabrane lage
dil men aa baiTha hai dekho duriyon ka devta
ham jama.at ke tasavvur se bhi uktane lage
tum kisi mazlum ki avaz ban kar gunjna
yaad meri jab tumhen shiddat se taḌpane lage
le raha hai dard angḌa.i uTha vo ehtijaj
zaḳhm-ḳhurda sab parinde pankh phailane lage
kaam aisa kyuun kiya jaa.e ki jis ke ba.ad men
aadmi apne kiye par aap pachhtane lage
Leave a Reply