Siddique Mujibi
vafa kar magar ustuvari na rakh
koi bojh siine pe bhari na rakh
mohabbat ke badle mohabbat na maang
ki ye silsila karobari na rakh
kisi aur hiile se kar mustafiz
faqat rasm-e-bada-gusari na rakh
tu aaya hai to harf-e-matlab pe aa
zaban par bahut ḳhaksari na rakh
salamat nahin sar to dastar kya
bahut unchi apni aTari na rakh
haqiqat tujhe maar Dalegi sun
‘mujibi’ bahut jankari na rakh
Leave a Reply