tere dil men jo hiqarat hai tire bas men nahin
tere bachpan ki ye aadat hai tire bas men nahin
tum nahin manoge itni to ḳhabar hai mujh ko
chaar logon pe hukumat hai tire bas men nahin
kaj-suḳhan hai tu munafiq hai tu kam-zarf bhi hai
is havale se jo shohrat hai tire bas men nahin
aankh men niind utarne hi nahin deta hai
ḳhvab-zaron se jo hijrat hai tire bas men nahin
saans lene ko bhi ab teri ijazat chahun
ek nakam si hasrat hai tire bas men nahin
tujh se achchha hai jo ik aks tujhe bhata nahin
ye jo a.ine ki hairat hai tire bas men nahin
ye tiri aankh ke chhale hain kisi aur sabab
aur chehre pe jo vahshat hai tire bas men nahin
Leave a Reply