Suraj Ki Kiran Dekh Ke Bezar Hue Ho

Shahzad Ahmad

suraj ki kiran dekh ke bezar hue ho

shayad ki abhi ḳhvab se bedar hue ho

manzil hai kahan tum ko dikha.i nahin degi

tum apne liye aap hi divar hue ho

ehsas ki daulat jo milegi to kahan se

kuchh bhi na raha paas to hoshiyar hue ho

socho to hai maujud na socho to nahin hai

jis daam men tum log giraftar hue ho

apne se taghaful hai ki be-rah-ravi hai

kya soch ke duniya ke talabgar hue ho

ye rishta-e-dil toḌ ke kya tum ko mila hai

TuuTe hue patte ki tarah ḳhvar hue ho

pahle bhi kabhi nuur ka ehsas hua tha

ya aaj hi is gham se ḳhabar-dar hue ho

majnun ho to hai ḳhaak uḌane se tumhen kaam

yusuf ho to rusva sar-e-bazar hue ho

kal tak to in ankhon men muravvat ki jhalak thi

fitna ho to phir aaj hi bedar hue ho

koi ufuq-e-dil pe numudar to ho le

tum kis ke qadam lene ko tayyar hue ho

ye chhab ye jhamak aankh se dekhi nahin jaati

tum uḌte hue vaqt ki raftar hue ho

‘shahzad’ ta.assuf na karo be-asari par

tum dast-e-rasa kab the ki bekar hue ho