Pir-E-Tasma-E-Pa

mere kandhe pe baitha koi

padhta rahta hai injil o quran o ved

makkhiyan kaan men bhinbhinati hain

zakhmi hain kaan

apni avaz kaise sunun

raana hindu tha akbar musalman tha

sanjai vo pahla insan tha

hastinapur men jis ne qabl-e-masih

television banaya

aur ghar baithe ik andhe raaja ko

yudh ka tamasha dikhaya

aadmi chand par aaj utra to kya

ye taraqqi nahin

ab se pahle, bahut pahle

jab zarra tuuta na tha

chashma jauhar ka phuta na tha

farsh se arsh tak ja chuka hai koi

ye aur aisi bahut si jahalat ki baten

mere kandhe pe hoti hain

kandhe jhuke ja rahe hain

qad mira raat din ghat raha hai

sar kahin paanv se mil na jaae

Leave a Comment