Sabir Waseem
vo phuul tha jadu-nagri men jis phuul ki ḳhushbu bhaa.i thi
use laana jaan ganvana tha aur apni jaan para.i thi
vo raat ka tul-tavil safar kya kahiye kaise aa.i sahar
kuchh main ne qissa chheḌa tha kuchh us ne aas bandha.i thi
ḳhvabon se udhar ki masafat men jo guzri hai kya puchhte ho
ik vahshat char-pahar ki thi ik jalti hui tanha.i thi
vo raat ki jis ke kinaron par ham milte aur bichhaḌte the
ik baar mujhe tanha pa kar us ki bhi aankh bhar aa.i thi
har shaam ufuq ki duuri par koi sahma sahma phirta tha
tasvir jo us ki bana.i to ḳhud apni shakl bana.i thi
Leave a Reply