taashshuq-lakhnavi

Yaad-E-Ayyam Ki Ham-Rutba-E-Rizwan Hum The

yad-e-ayyam ki ham-rutba-e-rizvan ham the

baghban-e-chaman-e-mahfil-e-janan ham the

qabil-e-qatl na ai lashkar-e-mizhgan ham the

dil ki ujdi hui basti ke nigahban ham the

dhajjiyan jeb ki hathon men hain aaj ai vahshat

jama-zebon se kabhi dast-o-gareban ham the

jaan li gesuon ne ulfat-e-rukh men akhir

kafiron ne hamen maara ki musalman ham the

ghair ke ghar ki taraf ke jo uthe the parde

itr balon men vo malte the pareshan ham the

qafas-e-tang men ghut ghut ke na marte kyun-kar

naz-parvarda-e-aghosh-e-gulistan ham the

ruuh tadpi hai pa-e-lala-e-sahra kya kya

fasl-e-gul josh pe thi qaidi-e-zindan ham the

dil ke dene men taammul hamen hota kyun-kar

ye hasinon ki amanat thi nigahban ham the

aaj thi shab ko bahut dagh-e-jigar men sozish

kahti thi un ki malahat namak-afshan ham the

shoala-e-husn se tha dud-e-dil apna avval

aag duniya men na aai thi ki sozan ham the

har taraf dahr men tha zulf ki zanjir ka gul

magar ai josh-e-junun silsila-jumban ham the

qafile raat ko aate the udhar jaan ke aag

dasht-e-ghurbat men jidhar ai dil-e-sozan ham the

kahte hain ariz-e-mahbub ki thi raat jo garm

chand par os padi thi araq-afshan ham the

tauq minnat ke gale men the vo din yaad karo

tum par us ahd men bhi chak-gareban ham the

dete phirte the hasinon ki gali men avaz

kabhi aina-farosh-e-dil-e-hairan ham the

Duub jaate hain jo rah rah ke ‘taashshuq’ taare

misl-e-abr akhir-e-shab vasl men giryan ham the

More Poems

Leave a Comment