fasl-e-gul men hai irada su-e-sahra apna
rang kya dekhiye dikhlata hai sauda apna
ishq men ham jo mitate hain kisi ko kya kaam
jaan apni hai dil apna hai kaleja apna
aah ham karte hain ai yaar ke mahfil vaalo
donon hathon se jigar thaam lo apna apna
puchhte kya ho judai men jo guzri guzri
tum ko maalum hai sab haal kahen kya apna
koi mushtaq raha jalva kisi ne dekha
is ko kya kijiye maqsum hai apna apna
zindagi shart hai kya dard-e-jigar se hoga
apne haq men to dam apna hai masiha apna
kaam aaya amal-e-nek mira turbat men
lillahil-hamd ki ik dost to nikla apna
puchhte hain jo koi naam mira leta hai
jante hain vo mujhe ashiq-e-shaida apna
najd men dard-e-jigar qais bayan karta hai
khuub hi roegi dil thaam ke laila apna
shahr se bhagte hain dasht men ghabrate hain
dil bahalta hi nahin ab to kisi ja apna
ediyan mujh se ragadvaegi majnun ki tarah
naam rakkha hai shab-e-vasl ne laila apna
ai ‘sharaf’ khair to hai haal hai kyuun sakte ka
aaina le ke zara dekho to chehra apna
Leave a Reply