hava se baada nichoḌen kali ko jaam karen
sukut-e-rang-e-chaman se zara kalam karen
hamen to koi bhi pahchanta nahin hai yahan
nigah kis se mila.en kise salam karen
zamana is pe tula hai ḳhirad ki baat rahe
hamen ye zid hai ki uncha junun ka naam karen
faza hai gosh-bar-avaz chup hain ahl-e-nava
ab is adhuri kahani ko ham tamam karen
tumhare jaam ko pahle nazar se chhalka den
phir apne hosh men aa kar tavaf-e-jam karen
kisi ghazal men bhi ab nahin ram-e-vahshat
ham apne sehr-e-tamanna se kis ko raam karen
ḳhulus-e-dil ka sila soz aarzu ka guhar
isi guhar ‘faridi’ charagh-e-sham karen
Leave a Reply