ajab hi kya hai agar dhund men ghubar men hai
vo shaḳhs apne bana.e hue hisar men hai
kahan hai vaqt abhi ham ko dil lagane ka
hamari soch abhi fikr-e-rozgar men hai
ghamon ke saa.e men ḳhushiyon ke phuul mahke hain
ḳhizan ka aks bhi kuchh mausam-e-bahar men hai
jo eqtidar ke laa.eq na tha kisi surat
sitam ye hai ki vahi shaḳhs eqtidar men hai
ḳhuda ko karna hai vapas rahe ḳhayal ‘ejaz’
hamare paas to ye zindagi udhar men hai
Leave a Reply