zamin meri rahegi na aa.ina mera
ki azmane chala hai mujhe ḳhuda mera
mire tilism se azad bhi nahin lekin
vo phuul pahli nazar men hua na tha mera
na.iim basra-o-baghdad harne ke ba.ad
mira vajud bhi shayad nahin raha mera
vo mere paas rahe ya kahin chala jaa.e
rahega us ke ḳhayalon se silsila mera
kisi ki khoj men nikla tha be-irada main
badan niDhal tha sar ghumta hua mera
nahin hai ab mujhe anjam ki koi parva
baḌha diya hai mohabbat ne hausla mera
hua hai qat.a masafat ka silsila jaari
main ruk gaya to badan TuTne laga mera
yaqin nahin hai magar naqsh hai mire dil par
ki ik pari ne banaya hai za.icha mera
vo baar baar palaTta hai duur ja-ja kar
so TuuT TuuT ke juḌta hai rabta mera
nazar ki had pe jo ik najm-e-ḳhvab hai ‘sajid’
vahi charagh hai us ka vahi diya mera
Leave a Reply