Abul Hasanat Haqqi
kabhi vo khush bhi raha hai kabhi khafa hua hai
ki saara marhala tai mujh se barmala hua hai
nashisten pur hain charagh-o-ayagh raushan hain
bas ek mere na hone se aaj kya hua hai
utha ke rakh do kitab-e-firaq ko dil men
ki ye fasana azal se mira suna hua hai
kabhi na khali mila bu-e-ham-nafas se dimagh
tamam baagh men jaise koi chhupa hua hai
miri giraft men aata nahin hai vo pal-bhar
miri nazar se mira dil abhi bacha hua hai
usi ke izn-o-raza se hai sab nigah-dari
ki dam-o-dana sabhi kuchh yahan pada hua hai
main khvab men bhi vo daman pakad nahin sakta
ye haath aur kisi haath men diya hua hai
yahi bahut hai agar ek ham-sukhan mil jaae
main sun raha huun mira dil bhi to dukha hua hai
miyan-e-vaada koi uzr ab ke mat laana
ki rahen sahal hain aur zakhm bhi khula hua hai
vo be-khabar hai miri jast-o-khez se shayad
ye kaun hai jo muqabil mire khada hua hai
Leave a Reply