main kaise jiyun gar ye duniya har aan nai tasvir na ho
ye aate jaate rang na hon aur lafzon ki tanvir na ho
ai rah-e-ishq ke raahi sun chal aise safar ki lazzat men
tiri ankhon men nae khvab to hon par khvabon ki taabir na ho
ghar aauun ya bahar jaun har ek faza men mere liye
ik jhuti sachchi chahat ho rasmon ki koi zanjir na ho
jaise ye miri apni surat mire samne ho aur kahti ho
mire shaer tere saath huun main mayus na ho dil-gir na ho
koi ho to mohabbat aisi ho mujhe dhuup aur saae men jis ke
kisi jazbe ka azar na ho kisi khvahish ki taazir na ho
Leave a Reply